ඉන්දු ශ්‍රී ලංකා නිදහස් වෙළඳ ගිවිසුම (ISFTA)
1998 දෙසැම්බර් 28 වන දින අත්සන් තබන ලදුව 2000 මාර්තු මස 01 වන දින සිට ක්‍රියාත්මක ඉන්දු - ශ්‍රී ලංකා නිදහස් වෙළඳ ගිවිසුම, ද්වීපාර්ශවීය වෙළඳාම සහ ආයෝජනය ප්‍රවර්ධනය කිරීම තුලින් ශ්‍රී ලංකාව සහ ඉන්දියාව අතර පවතින ආර්ථික සබඳතා වඩාත් දියුණු කිරීම අපේක්ෂා කරයි. මෙම ගිවිසුම මඟින් භාණ්ඩ වෙළඳාම පමණක් ආවරණය වන අතර දෙරටේ අපනයනයන් සඳහා තීරු බද්දෙන් නිදහස් මෙන්ම සහන සහිත තීරු බදු ඇතුලත් වෙළඳපොළ ප්‍රවේශයක් ලබා දීම සිදුවේ. තීරු බදු රහිත බාධා ඉවත් කිරීම ISFTA මඟින් සැලසෙන්නේ නැත.
2009 පළමු මාස 7 ඇතුලත දී ශ්‍රී ලංකාවෙන් ඉන්දියාවට සිදු කරන ලද අපනයන ඇ.ඩො.මි. 162.51 සිට ඇ.ඩො.මි. 239 දක්වා ඉහළ ගොස් ඇත්තේ අනුරූපී 2010 වර්ෂය තුල 45.4% ක වර්ධනයක් වාර්තා කරමිනි. 2009 අනුරූපී කාලය හා සමඟ සංසන්දනයේ දී 2010 පළමු මාස 7 ඇතුලත මේ වර්ධනයට ප්‍රධාන වශයෙන් බලපෑ හේතුව වන්නේ කුළුබඩු (කරාඹුනැටි, සාදික්කා, වසාවාසි, ගම්මිරිස්), විදුලි යන්ත්‍රෝපකරණ සහ කොටස්, තඹ නිෂ්පාදන, රබර් ෂීට්, පල්ප්, රසකැවිලි සහ බේකරි නිෂ්පාදන, ටයර් සහ ටියුබ්, වීදුරු ආශ්‍රිත නිෂ්පාදන, දැවමය නිෂ්පාදන, ඇඟළුම්, ඇඟළුම් සහ රෙදිපිළි උපාංග, ගෘහ භාණ්ඩ, සකසන ලද පළතුරු සහ බීම, ආභරණ ආදී ක්ෂේත්‍රයන්ගේ අපනයන ඉහළ යෑමයි. කෙසේවුවත් තේ, සෙරමික් නිෂ්පාදන, කුරුඳු, මැණික්, බොයිලේරු සහ යන්ත්‍රෝපකරණ, සැකසූ ආහාර, ඛනිජ වැලි, සක්‍රීය කාර්බනාදී අපනයනයන් 2009 වර්ෂයට සාපේක්ෂව 2010 ජූලි මස වන විට අඩු වී ඇත.
ISFTA යටතේ නිෂ්පාදන විවිධාංගීකරණය
එළවළු තෙල්, මූලික තඹ, මාගරින්, කිරිගරුඬ හා ගම්මිරිස් වැනි දැවැන්ත අපනයනයන්ගේ පහත වැටීමක් දක්නට ලැබුන ද විවිධ නිෂ්පාදන ගණනාවක්ම ඉන්දියාවේ වෙළඳපොළ වෙත ප්‍රවේශය ලබා ඇත. ඒවා අතර පරිවෘත කම්බි සහ කේබල්, කුකුල් කෑම, වායව ටයර්, සෙරමික්, ඇඟළුම්, ගෘහභාණ්ඩ, වායු සමන යන්ත්‍ර සහ ශීතක, මැනීමේ සහ පරික්ෂා කිරීමේ උපකරණ, වීදුරු බෝතල්, සකසන ලද මාංශ නිෂ්පාදන, මධ්‍යම ඝනත්ව තන්තු (MDF) පුවරු, රබර් අත්මේස්, තාප පත්‍රිකා, ටයිල්, ගල් වර්ග සහ කිරිගරුඬ, බොයිලේරු සහ යන්ත්‍ර කොටස්, යකඩ සහ ලෝහ ද්‍රව්‍ය, පැනල පුවරු සහ ආවරණ, බෑග් සහ ගමන් මළු ආදිය වේ.
පකිස්ථාන - ශ්‍රි ලංකා නිදහස් වෙළඳ ගිවිසුම(PSFTA)
2005 ජූනි මස 12 වන දින බලාත්මක කොට ක්‍රියාත්මක කරන ලද පකිස්ථාන - ශ්‍රි ලංකා නිදහස් වෙළඳ ගිවිසුම දෙරට අතර වෙළඳාමෙහි සැලකිය යුතු වර්ධනයක් සිදු කර ඇත්තේ 2004 වසරේ ඇ.ඩො.මි. 147.1 ක් වූ අගය 2015 වන විට දී ඇ.ඩො.මි. 370.38 ක වර්ධනයකිනි. 2004 වසරේ ශ්‍රී ලංකාවේ අපනයන අගය වූ ඇ.ඩො.මි. 39.2, 2015 වන විට ඇ.ඩො.මි. 73.10 ලෙස වර්ධනය වී ඇත්තේ සාර්ක් රටවල් අතුරින් පකිස්ථානය ශ්‍රී ලංකාවේ දෙවන විශාලතම වෙළඳ පාර්ශවකරු බවට පත්කරමිනි. මෙහි පළමු ස්ථානය හිමි වන්නේ ඉන්දියාවට ය.
ශ්‍රී ලංකාව පකිස්ථානය වෙත සිදු කරන ප්‍රධාන අපනයනයන් වන්නේ ගම්මිරිස්, බීඩි කොළ, බුලත් කොළ, පොල් කටු කැබලි, ස්වභාවික රබර්, පොල් සහ නැවුම් හා වියළි කජු, දැව හා දැවමය ද්‍රව්‍ය, ඛාදනීය එළවළු, තේ ය. PSFTA ගිවිසුමේ ආරම්භයත් සමඟ නව නිෂ්පාදන ගණනාවකට පකිස්ථාන වෙළඳපොළ වෙතට එළඹිය හැකි විය. ඒ අතර නැවුම් අන්නාසි, ක්‍රීඩා උපකරණ, ඇට සහිත සියඹලා, ඛාදනීය තෙල්, පෝසිලේන් පිඟන් භාණ්ඩ සහ මුළුතැන්ගෙයි උපකරණ, සෙරමික් ටයිල්, ගෘහ භාණ්ඩ, විද්‍යුත් ස්විච සහ සොකට්, ආයුර්වේද රූපලාවන්‍ය නිෂ්පාදන සහ ප්ලාස්ටික් ද්‍රව්‍ය, තීන්ත, වීදුරු පින්තාරු, හම් ආශ්‍රිත නිෂ්පාදන, ශීතකළ මාළු, ඉස්සෝ, පොකිරිස්සෝ, කකුළුවෝ, කැපූ මල් සහ ශාක පත්‍ර, මැණික් සහ ස්වර්ණාභරණ සහ මත්ස්‍යයින් ඇතුලත් වේ.
දෙරටම සිය බැඳීම් සම්පූර්ණ කර අවසන්ව ඇති අතර මේ වන විට දෙරටෙහිම නිෂ්පාදන 4500කට අධික ප්‍රමාණයක් තීරු බදු රහිත වෙළඳපොළ ප්‍රවේශය අත් කරගෙන ඇත.
